Minsken

Fergetten

troch Posted on 0 Comments 1 min read 499 views
Foto troch frommeske Andreea Popa fan Unsplash
Net ien neamt my mear by myn foarnamme." seit se tryst.

Ik ha mei har te dwaan. "Fest wol." sis ik.

"Jo binne samar fergetten." giet se fierder; "As jo net wat spektakulêrs dien hawwe sa as in minske ùt in brânend hûs as ien ùt in wek helle ha, dan binne jo foar de ivichheid fergetten."

Jo hawwe dochs bern? Dy sille jo wol nea ferjitte, soe it net?"

"Dat ist him just; ik sjoch hun noait."

"It is net in klacht fan in âld minske hear." seit se der hastich efteroan. "Mar se binne allegearre skieden en wer trouwd. Ik kin de oanhing net mear."

"En beppesizzers, ha jo dy ek?" freegje ik; "Sjogge jo dy wol es?"

"Hja binne ek fremd foar my. Net ien is nei my ferneamd." Ze laket skamper en lûkt in frjemd gesicht.

"Frou Dykstra!" ropt in suster; "Jo beppesizzer siket om jo!"

"Oant sjen!" rop ik noch mar ik bin alwer fergetten...

"Iet lekker..."

troch Posted on 4 Comments 1 min read 672 views

Eet lekker!" ropt se en set it ieten op tafel, eltse middei wer.

Hiel freonlik hear, mar werom seit se it altyd yn it Hollânsk freegje ik my ôf. Oant ik it op in kear it net litte kin en freegje werom se dat sa seit.

"Doch ik dat?" seit se en sjocht my net begripend oan.

"Jo binne dochs in Friezinne." sis ik.

"Ik bin trouwd mei in Hollânner en no praat ik twa talen trochinoar." seit se.

"Goedenmorgen." seit in oaren ien eltse moarn. "Goeiemoarn." sis ik dan werom.

Hoe kin dat no? freegje ik my ôf. It binne hjir hast allegearre Friezen en werom ferbrekke se hun dan? Ha wy somstiden muoite mei ùs taal yn it deistige ferkear yn de deistige omgong meielkoar?

Ek yn de pleatselike supermerk praat it personiel Hollânsk tsjin de klant mar underling Frysk. Soene se eangstich weze on klandyzje te ferlizen?

Ik nim my foar om der op subtile wize sûnder twang as argewaasje wat oan te dwaan. 

"Net oerdriuwe hear." seit de soan; "Dat wurket oarsom as op `t hynder sitte."

"Iet lekker!"

Dag, sis ik.

troch Posted on 2 Comments 2 min read 533 views

Wolle jo in wurdsje sizze mei de routsjinst fan myn mem?" freget se; "Jo ha har salang kinnen."

Ik skrik erfan, it oerfalt my. Der moat ik oernei tinke.

Efkes letter stjûr ik har in berjochtsje dat ik dat net dwaan kin. Ik bin der te emosjoneel  en te skrutend foar,  soks soart dingen is neat foar my.

De hiele dei tôchje ik der mei om en ha lêst fan mysels.

Ik ha har wol sechstich jier kinnen. We hawwe tegearre in soart meimakke en soe ik dat no net foar har dwaan wolle.

Letter op `e moarn skilje ik har werom; "Rekkenje mar op my." "Ik hie net oars fan jo ferwachte." seit se.

Nò moat er wat op papier. Mar wat? It moat net it selde wurde as wat de famylje seit, betink ik my. 

Ik gean yn tinzen werom nei de earste kear do ik har moete yn de haven fan Langwar. It sloech oan: wy hâlden altyd kontakt, wert wy yn de wrâld ek wienen.

Ik set wat op papier mar ferskuor it hieltyd wer. In kreas stikje mar it rekket myn hert net. De kompjûter makket oerûren en de printer seit: "Doch it sels mar."

Einliks, as de sinne ûnder giet en de skimering ynfalt bin ik tefreden. As ik dan yn de grutte grôtfolle tsjerke stean ferhelje ik mei fêste stim oer ùs freonskip.

Se sjocht my oan en glimket.

"Dag." sis ik, en nim ôfskied.

Foarlêze

troch Posted on 1 Comment 1 min read 508 views
Foto troch Lilly Rum fan Unsplash
Wolle jo ien middei yn de wike foarlêze?" freegje se my.

Ik wol graach wat foar de mienskip dwaan mar ik bin net oerâl like goed yn,

Foarlêze like my dochs wol wat mar dat is makliker sein as dien. De earste kear foel tsjin: foar dat ik goed en wol ùt ein set wie, wie de helt al yn sliep fallen.

Geandewei waard it better. Ik hie troch dat it koarte stikjes wêze moasten. En se moasten fuortendaliks oandacht lûke.

In kollega hie in stikje oer behingjen  makke. Myn buorfrou fan hûnderd fearre oerein. "Dat ha ik faker dien." flùstere se.

Ek it teltsje oer pankoekbakken sloech oan, se begûnen om it hurdst te roppen.

"Nije wike wer hè?" rôp âlde Jilderd en treaun net sêftsinnich de rollater foar him ùt.

"Hoe fûnen jo it, Adema?" frege ik.

"Moai lêzen hear. Ik koe net alles hearre mar dat lei him oan my."

Foarlêze.

Hernia

troch Posted on 1 Comment 1 min read 574 views
- Fotograaf ûnbekend. -
Ik bin by de pinepoly fan it sikenhûs.

Nei dat ik my oanmeld ha gean ik sitten en ferfeel my mei blêden dy âlder binne dan ik sels.

Nei in skofke komt er in jonge frou  yn de wachtkeamer. Se sit yn in weintsje treaun troch in jongeman.

Behelpsum freget er har wert se sitte wol, en as se it wol waarm genoch hat.

Hoeden triuwt er har by de tafel. Ik skat har op noch gjin tritich jier.

Ik begjin in praatsje en al ridlik gau komt se los. Se seit dat se in harsenblieding hân hat.

"It is in ramp foar my," seit se; "ik wie krekt begûn as selfsstannige undernimmer."

Se kin it net droech hâlde en ik krij it ek te krap.

"Mar se krije my der net ûnder." seit se striidber en faget de triennen oan de jas ôf.

Myn namme wurdt roppen.

Wat doch ik hjir eiglik? freegje ik my ôf. Ik wol fuort mar de dokter stiet al yn de doar.

Hernia.

De mem de frou

troch Posted on 0 Comments 1 min read 745 views

De boekenwike 2019  stie yn it teken fan 'De moeder de vrouw'.

Hiel yntresant en dat brocht my op it idee om es oer ùs mem te skriuwen want dat ha ik yn al myn skriuwsels nea dien.

Mar dat falt net mei want ùs mem hie folle kanten: se hat har nea deljaan kinnen yn it doarp wert se wennen. Dat lei net oan de minsken as oan it doarp mar oan har sels, sy koe gjin oansluting fine by har doarpsgenoaten .

En as jo dat net kinne, dan binne jo bûten sluten.

Mar as it de middei fan it folksdûnsjen wie, dan stie se ier en betiid ferklaaid klear. Dagen moasten wy oanhearre hoe moai as it west hie en dy se de paskes foar dy sy leard hie.

En dan noch it foardragen: dan feroare se, se strielde en wie net de mem dy ik koe.

Net eltsenien koe dy kant fan har wurdearje want yn dy tiid moasten jo gewoan weze sa as oaren wiene.

De mem de frou: net maklik foar dy jinge dy har leaf hiene.

No ik âlder wurden bin, tink ik noch faak oan har. Wat hie se har untwikkelje kinnen mei al har talinten as se yn dizze tiid libbe hie.

De mem de frou.

Mist wurde

troch Posted on 3 Comments 1 min read 845 views
Foto troch Suzy Hazelwood fia Pexels [klik foar grut]
Pier is juster ferstoarn." seit in bewenner tsjin my. We bliuwe efkes stean en hawwe it oer de ferstoane.

Ik ha Pier wol fjirtich jier kinnen, hy wenne mei syn frou ticht by ùs. We hiene in 'klik' sa `t hja hjoed-de-dei sizze.

Altyd efkes swaaie as in praatsje oer it waar en de bern. Ik sil him misse mei syn gekjeierij.

Yn ùs nije omjouwing gean gauris minsken dea, faaks troch âlderdom.

De iene seit jo mear as de oare mar eltse kear rekket it my hoewol ik somtiden de persoan hielendal net kint ha.

"Wat soe dat foar minske west ha?" freegje ik my dan ôf. "Hat se wat neilitten foar de minsken om har hinne?"

En dan ha ik it net oer it ierdske guod mar oer it wêzen fan dyjinge.

Hat hy as sy waarmte en meiminslikheid utdield, de wrâld in bytsje better makke?

Mist wurde...

Weemoedigens

troch Posted on 1 Comment 1 min read 479 views
Foto: Michael Gaida | PixaBay
Trije dagen efterinoar lizze der leedbrieven by ùs op de doarmatte, fan trije lju dy wy goed kinnen hawwe, de iene better as de oare.

Se binne foar in grut part in ein mei ùs oprûn op ùs libbenswei.

Ik gean der by sitten en lit se stik foar stik oan myn eagen foarby gean.

Op ferskate wegen binne wy elkoar tsjinkaam. De iene troch it tsjerkelik wurk, en de oare troch houlik. De lêste as wurknimmer, dat fjirtich jier duorje mocht.

Mei elkoar oprinne, dat betsjut hichte- en djiptepunten mei-inoar diele.

Se litte in fremd, leech gefoel by my nei. It wie ommers sa gewoan, se wiene der altiid by.

Ik tear de leedbrieven mei weemoedigens op en bin tankber dat ik dizze minsken yn myn libben moetsje mocht.

Weemoedigens...

Holland-Amerika Lijn

troch Posted on 2 Comments 1 min read 676 views

Mannestimmen fan in shantykoor sjonge oer fiskers dy hun libben lieten op sé. De seal is ofladen en mannichien sjongt mei, kin min de tekst net dan nùndert min gewoan mei.

Neist my sit in kreaze steatige frou -al op leeftyd- se hat wat oer har wat myn oandacht lûkt. Sy sjongt net mei mar stoarret nei it programma.

Se draacht in trainingspak mei in grut embleem fan de "Holland-Amerika" der op.

Dat is men hjir net went fan in frou fan dy âldens. Der moat ik mear fan witte en freegje; "Heeft u gevaren?"

En dan begjint se seft te praten om net te steuren. Se wie frij faam en hie jierren lang hostess west op it grutte ferneamde skip.

En sa befarre wy tegearre de wrâld en ferjitte alles om ùs hinne.

"Nea de leafde fûn?" freegje ik. "Nee," seit se; "het schip was mijn grote liefde."

"Velen hebben een prachtige wereldreis gemaakt en daar mocht ik aan mee werken." seit se mei in glimke.

Ik gean nei hûs, yn gedachten by de hostess fan de Holland-Amerika Lijn.

Ik wol bliuwe ...

troch Posted on 1 Comment 1 min read 581 views
Foto troch frommeske Kat Jayne fan Pexels
Ik wol bliuwe." seit se striidber, de hânnen yn de skelksbûse en de fuotten wiidùt.

Sa stiet se foar my nei dat ik har sein ha dat de bern grut genoch binne en wy ùs sels wol rêdde kinne.

Se wie al jierren by ùs, twa kear yn `e wike kaam se de boel te behimmeljen.

Fergroeid mei ùs hùshâlding. As wy wer es wat kwyt wiene; Frou Stienstra wist wert it lei.

Se naam de telefoan oan en koe sa troch de jierren hinne ùs hiele famylje en goekunde.

Mar se wie net mear nedich.

"Ik wol net foart." seit se oerstjûr en gûld it ùt.

"Ik wol hjir bliuwe!" ropt se; "Jo hoege my net te belenjen. Ik wol it fergees wol dwaan. It is myn utsje, thùs ha ik neat mear."

Se is noch in pear jier bleun, oant se troch in auto oanriden waard.

Faaks moat ik noch oan har tinke, bliid dat ik har kinnen ha.

En tankber dat wy wat betsjutte koene yn har kleurleaze bestean.

"Ik wol bliuwe ..."